मिर्जापुर में झुमका -नथुनी गढ़ाद पिया,
विंध्याचल घुमाद पिया ना II
पहले गंगा जी नहाइब,
सीढ़ी चढ़िके मंदिर जाइब I
माला – फूल माई के चरन चढ़ाद पिया I
नथुनी गढ़ाद पिया ना I
मिर्जापुर में झुमका -नथुनी गढ़ाद पिया,
विंध्याचल घुमाद पिया ना II1II
सावनी रिमझिम बरसे बदरा,
चमके बिजली हहरे जियरा I
गंगा तीरे हमके नाँव में घुमाद पिया,
नथुनी गढ़ाद पिया ना I
मिर्जापुर में झुमका -नथुनी गढ़ाद पिया,
विंध्याचल घुमाद पिया ना II2II
काली खोह अष्ट भूजा,
विंध्य वासिनी के पूजा I
त्रिकोण यात्रा रोपवे से अब कराद पिया, नथुनी गढ़ाद पिया ना I
मिर्जापुर में झुमका -नथुनी गढ़ाद पिया,
विंध्याचल घुमाद पिया ना II3II
पुराना ओझला के पूल,
अंदर चलेला स्कूल I
पक्के घाट से चूड़ी – बिंदी लिआद पिया,
नथुनी गढ़ाद पिया ना I
मिर्जापुर में झुमका -नथुनी गढ़ाद पिया,
विंध्याचल घुमाद पिया ना II4II
घंटाघर – मुकेरी बाजार,
बूढ़े नाथ शिव – दरबार I
पंनदरिया में मगही पनवा खिआद पिया,
नथुनी गढ़ाद पिया ना I
मिर्जापुर में झुमका -नथुनी गढ़ाद पिया,
विंध्याचल घुमाद पिया ना II5II
कालीन मिर्जापुर के शान,
देश -विदेश में बढ़ल मान I
नरेश हँसत – बोलत जिनगी बिताद पिया,
नथुनी गढ़ाद पिया ना I
मिर्जापुर में झुमका- नथुनी गढ़ाद पिया,
विंध्याचल घुमाद पिया ना II6II
कवि इंजी. राम नरेश “नरेश”
वाराणसी (उ.प्र)
